آه.....بقلم الشاعرة بتول العتريى

آه
يا ربى ساعدنى على النسيان
مش عارفة أنا أهدى ولا أنسى
وعقلى تاه فى السرحان
ما كنت أناضله أنا بيته
وكان يجينى فين ما كان
وكنت أعمل له سهراية
و غنوة تقولها الألحان
وكان يقعد هنا جنبى
ساعات وعينيه فى عنيه
ومش قادر على الكتمان
يقولى كلام بحنية
يطبطب ويدارى عليه
قساوة الغيرة والأحزان
ولماأبعد يكون سارح
ما يعرف بكرة من امبارح
ويكتب فيه أشعاره
ما أنا نهاره
وليله لو سهر فى مكان
أكون دايما على باله
وفكرى ينشغل لو خان
وأهو خلاص ضاع منى
فى همسة من حنان إنسان
نده جاله بأشواقه
وقاله حبيبى ومنايا
ح أكون لك عش وضل أمان
وصدق البطل قوله
صبح طوله كما عرضه
ويتكلم بألف لسان
أنا باعشق يا جنية
و قلبى داب وحبى بان
وح تعيشوا سوا برضه
على الكلمة إللى راح تنصان
أكيد الكلمة مش عنده
كما الكلمة إللى قالها زمان
وأنا والفرح ناسينى
ودبلت منى بساتينى
أموت والقهر كاوينى
من الخدعة إللى جت فى أوان
أوان كان الأمل ليا
وفى عينيا الحياة ألوان
وباتصبر سنين عمرى
أعوض فيها الأشجان
لقتنى للفرح ناسية
ومنسية وأدوب فى واحة النسيان
وآه
يا ربى ساعدنى على النسيان
بتول العتربى